Joh 6:1-15 | YomNWM | STEP | Mambu momo bu mavioka, Yesu wusabuka ku disimu dinkaka di mbu wu Ngalili, wubeta tedila diaka mbu wu Tibeliadi.

John 6:1-15

Yesu wudikila mili tanu yi babakala

(Matayi 14.13-21 ; Malako 6.30-44 ; Luka 9.10-17)

1 Mambu momo bu mavioka, Yesu wusabuka ku disimu dinkaka di mbu wu Ngalili, wubeta tedila diaka mbu wu Tibeliadi. 2 Nkangu wu batu wunlandakana bila batu bamona bikumu ki kavanga mu bambevo. 3 Yesu wumaka ku mongo ; kuna kavuanda ayi minlonguki miandi. 4 Muaki Pasika, nyengo wu Bayuda, wuba nduka.

5 Yesu bu kazungisa thalu mu zindambu zioso ; wumona nkangu wu batu weti kuiza ku kaba, wuyuvula Filipi ti :

—Filipi, kuevi tufueti sumbila mapha muingi batu baba badia e ?

6 Wutula bobo mu kummeka kuandi bila niandi veka wuzaba diambu mbi keka vanga.

7 Filipi wumvutudila :

—A mueni Nlongi : mapha makua tulenda sumbila mu zikhama zizole zi denali ^{▼▼Zikhama zizole zi denali : zidedikini mu mfutu wu kisadi kimosi mu tezo ki nana di zingonda.}, malenda fuana muingi kadika mutu kabaka tini e ?

8 Nlonguki wumosi mu minlonguki miandi, Andele khomba yi Simoni Piela wunkamba :

9 —Muana ditoko dimosi didi vava beki mapha matanu ayi zimbizi zizole zinlangu. Vayi mbi binsundula mu diambu di nkangu wu batu baba e ?

10 Yesu wukamba :

—Luvuandisa batu boso.

Biti biwombo biba va buangu beni. Babakala bavuanda. Baba nduka-nduka mili tanu. 11 Yesu wubonga mapha beni, wuvutula matondo, wukabudila batu bobo bavuanda. Wuba vana zimbizi boso bu bela luzolo luawu. 12 Bu bamana yukuta, Yesu wukamba minlonguki miandi :

—Buabu, lukubika bitini biobi bisiadidi muingi ka diambu ko tini kimosi kibika bungana.

13 Bakubika bitini beni ; bawesa kumi ayi bipani biodi mu bitini bisiadidila mu mapha matanu momo batu badia.

14 Batu bu bamona kumu kioki Yesu kavanga ; buna bakamba ti :

—Bukiedika kuandi ti mutu wowo niandi mbikudi wowo wufueti kuiza va nza !

15 Yesu bu kazaba ti batidi kuiza ayi kunkitula ntinu mu kingolo ; buna wuyenda diaka niandi veka ku mongo.